निरंजना न्यूज नेटवर्क
सातारा:
सातारा जिल्हा मध्यवर्ती सहकारी बँकेच्या बहुचर्चित नोकरभरती प्रक्रियेला अखेर राज्य सरकारने स्थगिती दिली आहे. भूमीपुत्र संघटनेचे अध्यक्ष प्रवीण बाबर (अण्णा) यांनी या भरतीतील गैरव्यवहाराविरोधात पुकारलेल्या कायदेशीर आणि संघटनात्मक लढ्याला हे मोठे यश मानले जात आहे.
विभागीय सहनिबंधकांचे आदेश
विभागीय सहनिबंधक (सहकारी संस्था, कोल्हापूर विभाग) यांनी सातारा जिल्हा बँकेच्या मुख्य कार्यकारी अधिकाऱ्यांना लेखी पत्राद्वारे (जा.क्र. कक्ष-४/जिमस/सातारा/नोकर भरती/२०२६) ही स्थगिती कळवली आहे. मुंबई उच्च न्यायालयाच्या नागपूर खंडपीठात दाखल असलेल्या याचिका क्र. १६९१ चा अंतिम निकाल लागेपर्यंत ही प्रक्रिया थांबवण्याचे आदेश देण्यात आले आहेत.
नेमके प्रकरण काय?
सन २०२४ मध्ये ‘वर्कवेल इन्फोटेक प्रा. लि.’ या एजन्सीमार्फत राबवण्यात आलेल्या या भरती प्रक्रियेत मोठ्या प्रमाणावर अनियमितता आणि भ्रष्टाचार झाल्याचा आरोप प्रवीण बाबर यांनी केला होता.
यासंदर्भात बाबर यांनी सहकार मंत्री, सहकार आयुक्त आणि निबंधकांकडे पुराव्यासह तक्रारी केल्या होत्या.
भरती प्रक्रियेत नियमांचे पालन झाले नसल्याचे आणि आर्थिक गैरव्यवहार झाल्याचे गंभीर दावे भूमीपुत्र संघटनेने केले होते.
अन्यायावर प्रहार, सामान्यांचा आधार!
या निर्णयावर प्रतिक्रिया देताना प्रवीण बाबर (अण्णा) म्हणाले की, “हा विजय जिल्ह्यातील सुशिक्षित बेरोजगार तरुण आणि शेतकऱ्यांचा आहे. जिल्हा बँक ही शेतकऱ्यांच्या रक्ताघामाची संस्था आहे, तिथे भ्रष्टाचार खपवून घेतला जाणार नाही. जोपर्यंत या प्रकरणाचा पूर्ण निकाल लागत नाही आणि दोषींवर कारवाई होत नाही, तोपर्यंत आमचा लढा सुरूच राहील.”
या स्थगिती आदेशामुळे जिल्ह्याच्या राजकीय आणि सहकार क्षेत्रात मोठी खळबळ उडाली असून, भूमीपुत्र संघटनेच्या ताकदीची पुन्हा एकदा चर्चा सुरू झाली आहे.
