निरंजना न्यूज- निलेश बाबर
सातारा जिल्हा परिषद व पंचायत समिती सार्वत्रिक निवडणूक २०२६ अंतर्गत भुईंज जिल्हा परिषद गटासाठी झालेल्या निवडणुकीत दिलीप ज्ञानोबा बाबर यांनी ८९४ मतांच्या स्पष्ट फरकाने ऐतिहासिक व दणदणीत विजय मिळवला आहे. हा विजय म्हणजे सर्वसामान्य जनता, शेतकरी, महिला आणि युवकांनी व्यक्त केलेल्या विश्वासाची ठोस पोचपावती असल्याचे बोलले जात आहे.
भुईंज गटातील भुईंज, पाचवड, उडतरे व परिसरातील गावांमध्ये मोठ्या उत्साहात मतदान पार पडले होते. शांततेत आणि उच्च मतदान टक्केवारीसह ही निवडणूक पूर्ण झाली. मतमोजणीच्या दिवशी सकाळपासूनच मतमोजणी केंद्र परिसरात मोठी गर्दी उसळली होती. अंतिम निकाल जाहीर होताच दिलीप ज्ञानोबा बाबर यांना विजयी घोषित करण्यात आले. त्यानंतर कार्यकर्त्यांनी ढोल-ताशांच्या गजरात, फटाक्यांची आतषबाजी करत जल्लोष साजरा केला.
दिलीप ज्ञानोबा बाबर हे भुईंज गटातील ‘आपला माणूस’ म्हणून ओळखले जातात. जनतेशी थेट संवाद, प्रत्येक गावात सातत्याने उपस्थिती, समस्या ऐकून तात्काळ पाठपुरावा हीच त्यांची कार्यपद्धती राहिली आहे. रस्ते, पाणीपुरवठा, आरोग्य सुविधा, शाळा, अंगणवाडी, शेतकरी प्रश्न, रोजगार व युवकांसाठी संधी निर्माण करण्यावर त्यांनी प्रचारादरम्यान विशेष भर दिला होता. त्यांच्या याच विकासाभिमुख भूमिकेला मतदारांनी मोठ्या प्रमाणावर पाठिंबा दिला.
या निवडणुकीत तरुण, महिला व शेतकरी मतदारांनी बाबर यांना मोठ्या प्रमाणावर मतदान केल्याचे चित्र पाहायला मिळाले. “विकास, विश्वास आणि पारदर्शकता” या त्रिसूत्रीवर आधारित नेतृत्वाला भुईंज गटातील जनतेने कौल दिल्याची चर्चा राजकीय वर्तुळात सुरू आहे.
विजयानंतर दिलीप ज्ञानोबा बाबर यांनी मतदारांचे, कार्यकर्त्यांचे आणि समर्थकांचे आभार मानले. “भुईंज गटातील जनतेने माझ्यावर जो विश्वास दाखवला आहे, तो कधीही डळमळीत होऊ देणार नाही. भुईंज गटाच्या सर्वांगीण विकासासाठी निधी आणणे, रखडलेली कामे मार्गी लावणे आणि प्रत्येक गावाच्या मूलभूत गरजांना प्राधान्य देणे हेच माझे पहिले उद्दिष्ट राहील,” असे त्यांनी स्पष्ट केले.
या दणदणीत विजयामुळे भुईंज गटाच्या विकासाला नवी दिशा मिळणार असून येणाऱ्या काळात गटातील नागरिकांना ठोस विकासकामांचा लाभ मिळेल, अशी अपेक्षा सर्व स्तरांतून व्यक्त केली जात आहे.
